Vincenzo Russo

Poeta e Scrittore

“’A città d’’e nummere”

 

 

Luna, luna argiento, città ‘e marenare, quanno ‘a notte spont’a luna,

miezz’ l’onde co’‘e lampare, “46 cummà, so’ asciute ‘e denare”.

Sole, sole d’oro, Napule aspetta ‘a sciorta, napulità scetateve, nun aspettate

‘a morte. 47, se parla 48, me si venuto ‘nsuonno, aggio jucato ’o terno ‘o banculotto.

“Non ti pago!” “Edua’ chi se ne fotte, dimane vaco ‘a ‘n’ato banculotto!”

Settembre, San Gennaro e Piererotta! Passianno miezz’ ‘a gente, me piglia

‘na paura, 52 ‘a mamma, ma nun veco ‘a criatura!

A Marechiaro ce sta ‘na fenesta, sonano ’e manduline, “Santa Lucia luntana”,

“Avito fatto, l’ambo? È asciuto 5, ‘a mano”

‘Nzieme ‘o Vesuvio dorme, sotto ‘a cuperta ’e stelle, “Songo io, Pullecenella” 75.

Se sceta sulamente se ‘o puorte ‘na carezza, ma ogni tanto,

pure p’addore d’’a munnezza!

“Accatteteve ‘o pere e ‘o musso!” “’O tengo cavere ‘o panzarotto!”

“ Sore’, ‘a Madonna, ‘o vvi ccà, è asciuto l’ 8”

Jammo ‘a pere abbascio ‘o Carmine, pe’ Quartieri, a Sanità, doie lenzole,

‘na cammisa, stese ‘o sole a s’asciuttà. Piante, 81‘e sciure, cazettini,

35 ‘n’aucelluzzo, duie lumini.

“Ma ’e chi è chillu barcone? M’’o può dicere nennè?”

“Signorina alzate il capo, ecco qua, 43!”

‘Onna pereta affacciateve, tutto ‘o vico vo’ sapè”

“Fuimmo Ferdinà, ‘e cose nun stanno bbone, ‘o popolo vo’ l’aria,

parla ‘e Rivoluzione. “Afferra ‘e guarattelle, fuimmo de’ Francise”

‘e rote d’’a carrozza, ‘ncoppa ‘nu muorto acciso, 62.

“Fuimmo de’ Francise, afferra ‘e guarattelle,

‘o popolo ‘nsurgenno va arete a Masaniello”.

“E ce ne costa lacreme ‘st’America”

“Parteno ‘e bastimenti, pe’ terre assaie luntane”

Resta ‘na cartulina mano ‘e napulitane. Storie ‘e Rignanti, Principi e Regine,

Giovanna e Margherita, quanno ‘o popolo co’ l’ogne afferra ‘a vita.

“Donna Cunce’, pusate ‘sto panaro, tengo famme, facimmece ‘na pizza!”

“State aspettanno ‘o nummero? 28 fanno ‘e zizze”.

Chiagnimmo pe’ ‘nu scippo, ‘e fosse miezz’ ‘a via, ’e quanno po’ sparammo,

futtenno ‘a polizia. “Aggio fatto! Cinquina, 24 ‘e guardie”

63 ‘a sposa, ‘a notte nun arreposa, raccumannanno ‘o prevete l’Ave Maria

co’ ‘e rose. “Nennè ma si sicura? ‘Nu juorno farraie ‘a spesa!”

“Ze Pre’ che ve fotte? Pensate addubbà ‘a chiesa” 84

13 Sant’Antonio, 19 San Giuseppe, 33 so’ l’anne ‘e Cristo,

“Maronna ‘sto guaglione comm’ è ‘nzisto”

“Sapisse comm’ è nato! ‘A mamma ‘o lassaie fore all’Annunziata”

“Miracolo, miracolo, pure chist’anno è stato, ‘o sanghe

‘e San Gennaro s’è squagliato”18

“Te piace ‘o presepio?”

Teatro nel teatro, ‘na scena ‘sta città, chiurennose ‘o sipario,

‘a cumpagnia ‘a magnà.

“Tiene ‘na vocca amara? Vulisse faticà pe’ da’ ‘o pigione a me?”

“Ma vuie sentite a chisto! Assettate, parlamme, pigliammece ‘o cafè!” 42

“Attenzione, battaglione, è asciuto pazzo ‘o padrone ‘e casa!” 31

Sfugliatelle, pastiera, babbà, brodo ‘e purpe, vermicielle, baccalà,

zuppa ‘e cozzeche, zuppe ‘e fave, zuppa ‘e fasule 10, primma t’’e magne,

e po’…16 ‘o culo. Dal produttore al consumatore.

Struffoli, pasta ‘e mandorla, vongole, ‘nzalata ‘e rinforzo, papaccelle,

fichi secchi, capitone, roccocò, noci, nucelle, regali, pure chist’anno

è arrivato Natale 25.

Bengali, fitti fitti, tricchi tracche, castagnole, botte a muro,

“P’ammore d’’a Maronna, ‘e bombe nun se sparano, fanno male ‘e criature”

‘O Munaciello, ‘a Bella ‘Mbriana, ‘o campusanto d’’e funtanelle

“Mi manda Picone” “ 44, t’aspettano ‘e cancelle!”

“Tombola, aggio fatto ‘a tombola”, “Controllate, chesta fa ‘e ‘mbruoglie!”

“Cummà ma voi che dite? L’aggio scegliuta bona ‘sta cartella”

Musica, musicanti, ballammo ‘a tarantella! 21, ‘a femmena annura,

“Malafemmena”

Chella ca guarda affianco, chella guarda ‘ncielo, chella ca’ guarda ‘nterra 6,

connula d’ammore, t’avimmo ringrazià, se ‘o munno ave ‘o futuro,

però fatello dicere, te serve pure ‘o pate d’’e criature 29.

“Napule è ‘a voce d’’e criature ca saglie chianu chianu”

Aiutammo ‘sti criature a cammenà pe’ ‘a mano.

‘A sagliuta ’e Santa Teresa, abbasce ‘o Pallunetto, ‘o Vommero, a Pusilleco,

‘nterra Mergellina, a San Gregorio, a Santa Lucia, dint’ Furcella,

‘o vico luongo, ‘o vico largo, ‘o vico astritto, a Tuledo, ‘ncoppa ‘e Mura,

“D’e cammenà pe’ Napule, nun voglio ave’ paura!” 90

“Acquaiuo’ l’acqua è fresca?” Napule è ‘na Santa d’’e Quartieri, Maria Francesca.

“Principe senza tiempo, prega pe’ ‘sta città. Tu nun si’ muorte mai.

Possibile ca’ ‘a Napule se parla sulo ‘e guai?”

“Guagliù siate cchiù onesti, strigniteve ‘na mano, se continuate accidere,

pe’ vuie nun ce sta dimane. E po’? Che v’aggia dicere? V’aspetto a uno a uno,

‘a porta d’’o canciello, ‘a tengo sotto ‘o vraccio ‘na copia d’‘A livella?

‘Nu poco simmo nuie, ‘nu poco songo ‘e muorte e ‘o Pataterno.

‘A vita comme ‘a tombola, po’ essere ‘nu terno”.

A vita è fatta ‘e nummere, pigliate ‘a miezz’ ‘a gente, chesta ‘a tombola vivente!

“Ricomincio da 3”. ‘A iatta. Astuzia, agilità e un po’ di opportunismo.

Luna, luna argiento, città ‘e marenare, quanno ‘a notte spont’a luna,

miezz’ l’onde co’‘e lampare. “Ccà sta ‘a mano e ccà ‘o panaro”

Sole, sole d’oro, Napule aspetta ‘a sciorta, ma è meglio ca ‘o sapite,

“‘A gente bbona è viva, nun è morta”

“Jucate gente, jucate”

LA POESIA